દીકરી મારી દોસ્ત..

“દીકરી મારી દોસ્ત..”

જયારે કોઇ પણ સર્જક પોતાની આંતરિક જરૂરિયાતને વશ વર્તી સર્જન કરવા પ્રેરાય છે ત્યારે એનું ભાવવિશ્વ એવું તો પારદર્શી થઇ જાય છે કે ભાવક પણ એમાં પોતાનું પ્રતિબિંબ સહજ ઝીલી શકે છે. છે.

ઝિલનું…એક બાળકનું એમના મનોજગતમાં આગમન તો એના જન્મથી યે પહેલાં ! એ પળથી લઇને એના ઉત્તરોત્તર વિકાસના સમયરંગને અહીં એમણે એવા તો વિસ્તૃત કેનવાસ ઉપર ઝીલ્યો છે કે એ અનેકરંગી ચિત્રો પરસ્પરના સંબંધની સમજણભરી સૌરભથી આસ્વાધ્ય બન્યા એમનું ભાવવિશ્વ બહુપરિમાણી છે. એ પરસ્પરના સંબંધોમાં જ સમેટાઇ જાય એવું નથી. એ તો એ જ કારણે એક વિશાળ વિશ્વ સમક્ષ ઉઘડે છે.

પ્રબોધ.ર. જોશી.( તંત્રી ઉદ્દેશ )

દીકરી મારી દોસ્ત વાંચવાની શરૂ કરી. પાના ફરતા ગયા..આંખો ડબડબી ઉઠી. અક્ષરો અને આંખો વચ્ચે આંસુના પડદાએ કેટલીયે વાર આડશ રચી. પણ એકવાર આંસુને ઢૉળાવ મળ્યો ..કે આંખો વહેતી રહી બેરોકટોક..ઝીલને સંબોધીને તું પત્રો લખતી રહી અને વાંચનારના અંતરને સ્પર્શતી રહી..કયાં કયાં અને કેટ-કેટલી રીતે એની તો તને કલ્પના પણ કેમ આવે ?

કોઇ બાહ્ય પરિબળો જેને લૂંટી કે નષ્ટ ન કરી શકે તેવી આ પૃષ્ઠો પર પથરાયેલી સમજણભરી સંવેદના દરેક મા ના અંતરની આરઝૂ છે અને પ્રત્યેક દીકરી માટે must એવી ભેટ છે. આભાર આ અનોખા અને ચિરંજીવી ઉપહાર માટે.

તરુબેન કજારિયા. (ભૂતપૂર્વ સંપાદક જન્મભૂમિ પ્રવાસી પૂર્તિના સપાદક )

“ કેવી રીતે મકાન ઘર થશે,

દીકરીને એ રીતો હું જણાવું છું. ”

પુત્રી સાથે વહાલભરી યાત્રા માણવા સાથે આ પુસ્તક દીકરીને લગ્નમાં આપવાની એક ઉત્તમ ભેટ પણ જરૂર સાબિત થશે. કેમકે અહીં દરેક પ્રકરણને અંતે સાસરે જતી પુત્રીને જીવન પાથેય કે ..વહાલના બે શબ્દો આજના સમયને અનુરૂપ આપેલ છે. સામાન્ય રીતે દીકરીને શિખામણના શબ્દરૂપે જે ચીલાચાલુ સૂચનો અપાય છે.. તેનો કયારેક વ્યવહારમાં અમલ થઇ શકતો નથી. તેને બદલે અહીં વાસ્તવિક જિંદગીમાં…સાંપ્રત પરિસ્થિતિમાં ખરેખર ઉપયોગી થઇ શકે તે જ વાત આપવાનો પ્રયત્ન કર્યો છે. કોઇ આદર્શવાદી, કોરી વાતો નહીં.. વ્યવહારમાં ઉપયોગી થઇ શકે..અમલમાં મૂકી શકાય અને તે દ્વ્રારા જીવન રળિયામણું બનાવી શકાય અને પુત્રીના અંતરને પણ સ્પર્શી જાય તે રીતે લગ્ન અંગેના વિચારો રજૂ કરી દરેક માતા પિતા અને પુત્રીને ઉપયોગી બની શકવાનો એક પ્રયાસ કરેલ છે. જેને આવકાર મળશે જ..એવી શ્રધ્ધા છે. કેમકે અહીં વ્યકત થયેલ દરેક શબ્દ સીધો અંતરના ઊંડાણમાંથી સહજતાથી આવેલ છે. જેમાં કલ્પના નહીં..સંવેદના છે..સચ્ચાઇ છે અને સહ્રદયતા છે. જેથી એની પાછળ રહેલ ભાવની ભીનાશથી ભાવકો ભીના થશે જ એવી પૂરી આસ્થા છે. કેમકે અહીં મકાનને ઘર બનાવવાની વાતો કરી છે. અને ઘર તો એને જ કહી શકાય, જયાં હૂંફ અને હાશકારો છલકતો હોય.

nilam doshi