જીવન જયાંથી પુનઃ શરૂ થયું..

નવચેતન દીપોત્સવી અંક 2014માં પ્રકાશિત લેખ..

જયાંથી  પુનઃ શરૂ થયું.

“ લાગે છે જયારે જીવનમાં કંઇ બચ્યું નથી

 જીવનની જ નવી  શરૂઆત હોય છે. “

નવચેતન તરફથી દિવાળી અંકમાં લખવાનો વિષય મળ્યો. બહું ગમી ગયો.અને રઇશ મણિયારની ઉપરની પંક્તિ મનમાં રમી રહી. વિષયના  અનુસંધાને જીવનકિતાબના પાના મનઃચક્ષુ સામે  ફરફરી રહ્યાં. વીતેલા વરસોની હારમાળા એક પછી એક પસાર થતી રહી. જીવન પુનઃ કયાંથી શરૂ થયું ? આ ક્ષણે તો તંત્રીશ્રીનો મજાનો પ્રશ્ન મનને મૂંઝવી રહ્યો છે.

જીવનના છઠ્ઠા દાયકામાં પ્રવેશવાની  ઘડી હવે બહું દૂર નથી. ત્યારે પાછળ વળીને  જોઉં છું, તો મને પોતાને પણ આશ્વર્ય થાય છે. સાચું કહું તો ઇશ્વર કૃપાથી આજ સુધી જીવન મોટે ભાગે સીધી રેખા પર સરળતાથી વહ્યું  છે.  એવો કોઇ મોટો વળાંક, કોઇ મોટો સંઘર્ષ જીવનમાં આવ્યો નથી.  હા, કદીક નાના, મોટા પ્રસંગો બનતા રહ્યા, એવા કોઇ પ્રશ્નો આવતા રહ્યાં  જે પીડાની અનુભૂતિ કરાવી ગયા. પરંતુ  જેને જીવનનો ટર્નીંગ પોઇન્ટ કહી શકાય, જે બિંદુથી  સમગ્ર જીવન પલટાઇ ગયું હોય એવી કોઇ મોટી ઘટના તો જીવનમાં બની જ નહીં ? મને પોતાને પ્રશ્ન થાય છે.આ વિષય મળ્યો ત્યારે જ જાણે આ વાતનું ભાન થયું. આને ઇશ્વર કૃપા ગણું ? સદનસીબ સમજું કે  કમનસીબ ?

  દરેકના જીવનમાં આવો કોઇ ટર્નીંગ પોઇન્ટ આવતો જ હશે અને હું જ એક માત્ર એનાથી વંચિત રહી છું ? ફરી એકવાર જીવનયાત્રા પર નજર નાખું છું. અડધી સદી જેવડા જીવનમાં સાવ કશું જ ન બન્યું હોય એવું થોડું હોય ?  

સૂર્યોદયની સાથે  રોજ એક નવી સવાર ઉઘડે છે અને સાથે સાંપડે છે ઇશ્વરની કૃપા સમો અણમોલ એવો એક વધારે દિવસ..પળપળનું બનેલું એક નવું જીવન રોજ સવારે શરૂ થતું હોય છે પરંતુ આપણે એનો અહેસાસ કરી શકતા નથી.  દુનિયામાં અનેક લોકો સૂતા પછી સવારે ઉઠી શકતા નથી , જીવનલીલા કયારે, કેવી રીતે, કઇ પળે સમાપ્ત થઇ જાય છે એ કોણ કહી શકે છે ? એથી જ તો રોજ સવારે આપણને જીવતદાન મળ્યું છે એમ વિચારી શકીએ તો એ દિવસને વેડફી શકીએ ખરા ?

જીવન છે તો ખુશીની, સુખની, આનંદની ક્ષણો પણ છે અને પીડા, વેદના અને સંઘર્ષની કપરી પળો પણ આવવાની જ. આશા અને નિરાશાની આવનજાવન જીવનભર ચાલતી રહેવાની.

જીવન ઝરણું કદી સીધી લીટીમાં નથી વહેતું. એમાં નાના મોટા અનેક વળાંકો તો આવતા જ રહેવાના. કોઇ વળાંક જીવનમાં કશુંક ઉમેરે છે તો કોઇ વળાંક  કશુંક  બાદ પણ કરી જાય છે. જીવન શારીરિક, માનસિક આર્થિક, સામાજિક વગેરે કેટકેટલા આયામોમાં પથરાયેલું હોય છે. એમાં કોઇ પણ ક્ષેત્રે અચાનક કોઇ મોટો  ફેરફાર થાય ત્યારે થોડી વાર માટે જાણે જીવન થંભી ગયું  હોય એવો આભાસ, એવી અનુભૂતિ મનને ઘેરી વળે છે. જેમાંથી સમયસર જો  બહાર ન નીકળી શકાય તો હતાશાની ઘેરી લાગણી ફરી વળે છે જે ડીપ્રેશન તરફ લઇ જાય છે. માનવીમાત્રનો પિંડ ભાવનાના અર્કથી બંધાયેલો છે. ખુશીથી એ હસી ઉઠે છે તો પીડાથી એ રડી પણ પડે છે.

2005માં આવી જ કોઇ હતાશા ભીતરમાં ઘેરી વળેલી.  દીકરી લગ્ન કરીને અને દીકરો આગળ ભણવા માટે અમેરિકા ગયા.  સ્નેહથી કલબલતો  માળો ખાલી થઇ ગયો. પરંતુ મારી સાથે મારી સ્કૂલ, મારા સંતાન જેવા વહાલા વિધ્યાર્થીઓ હતા તેથી વાંધો ન આવ્યો. પરંતુ એ જ અરસામાં શારીરિક તકલીફ એવી શરૂ થઇ કે દસ મિનિટ પણ બેસી ન શકાય. ગુજરાત અને મુંબઇ બંનેના અનેક  ડોકટરો પાસે ફરી વળ્યા.પરિણામ શૂન્ય. આ પીડા સાથે જ જીવતા શીખવું પડશે એ એક માત્ર ઉપાય. સ્કૂલની મારી અતિ પ્રિય નોકરી , મારા પ્રિય વિધ્યાર્થીઓને છોડવા પડયા.બહું વસમું લાગ્યું.

દુકાળમાં અધિક માસની જેમ વરસો સુધી ગુજરાતમાં રહ્યા બાદ અચાનક અમારી બદલી વેસ્ટ બેંગાલમાં કોલકત્તા પાસે આવેલા હલ્દિયામાં થઇ. નવી જગ્યાએ પતિદેવ એક્દમ બીઝી..દેશ, વિદેશમાં સતત ફરતા રહેવાનું. નરી એકલતા. આખી કોલોનીમાં હું એક જ ગુજરાતી. પુસ્તકો પણ ઘરમાં હોય એટલા જ. ન મળે કોઇ ગુજરાતી છાપા.  કશું જ ન મળે. અનેક પાર્ટીઓમાં જવાનું ફરજિયાત અને મળે ભાત, માછલા, ચીકન, મટન અને શરાબની રેલમછેલ.. એમાં ખાવું શું ? તમે તો ઘાસફૂસ ખાવાવાળા… એવી કોમેન્ટ સાંભળવા મળે.

 દીકરો, દીકરી કહે મમ્મી, તું કોમ્પ્યુટર શીખી લે. પણ બેસવાની તકલીફ મોટી. એકી સાથે અડધો કલાક જ બેસી શકાય. પણ એમ નિરાશ થઇને બેસી રહું તો તો આજ સુધીનું વાંચેલું, અન્યને કહેલું બધું નકામું જ કહેવાય ને ?

કોમ્પ્યુટરનો ક પણ નહોતી જાણતી.  દીકરા, દીકરીએ ઇ મેઇલ કેમ કરાય એ સમજાવ્યું. ધીમે ધીમે હું મેઇલ કરતી તો થઇ. રોજ કોમ્પ્યુટર ખોલીને કંઇક ને કંઇક શીખતી રહી. એવામાં રીડ ગુજરાતીના મૃગેશભાઇ ( હજુ પણ એમના નામની આગળ સ્વ. લખતા જીવ નથી ચાલતો.)નો પરિચય થયો. તેમણે બ્લોગ બનાવતા શીખવાડયું. ગુજરાતી ફોન્ટ શીખવ્યા. બ્લોગમાં શું લખવું એ સમજ નહોતી પડતી. પણ દીકરીને બહું મીસ કરતી હતી.તેથી એના શૈશવના  સ્મરણો લખવા ચાલુ કર્યા. ભાષાનો કે અભિવ્યક્તિનો કોઇ પ્રશ્ન ન નડયો. કેમકે શૈશવથી વાંચનનો અતિશય શોખ, પાગલપનની હદે શોખ હતો એ બીજરૂપે ભીતરમાં સંઘરાયું હશે. જેનો મને પોતાને પણ ખ્યાલ નહોતો.

 વહાલના દરિયા જેવી દીકરી સાથેના એ સ્મરણો બ્લોગ પર મૂકવા માંડયા.મારા આશ્વર્ય અને આનંદ વચ્ચે વાચકોનો અસાધારણ પ્રતિભાવ સાંપડવા લાગ્યો. ઉત્સાહ વધતો ગયો. લખાતું ગયું. જીવનસાથી હરીશે સૂચન કર્યું કે બહું સરસ રીતે લખાયું છે. અનેક લોકોને સ્પર્શશે. આનું પુસ્તક કર.

 આખરે પુસ્તક થયું. “ દીકરી મારી દોસ્ત “  પુસ્તકનું નામકરણ કરીને ફૈબા બન્યા તરૂબેન કજારિયા. પુસ્તકની આજે તો પાંચ આવૃતિ થઇ ચૂકી છે.અંગ્રેજી , હિન્દી આવૃતિ પણ થઇ છે.

બસ. મને લાગે છે  જીવનનો ટર્નીંગ પોઇન્ટ કહેવો હોય તો આને જ કહી શકું. એકલતા દૂર થઇ શકી.  જીવન સ્થિર થઇ જશે કે શું ? એવા કોઇ અદીઠ ભયના ઓથારમાંથી બહાર આવી શકાયું.  ફરી એકવાર જીવન ઝરણું ખળખળ કરતું વહી રહ્યું. ફરી એકવાર ઉત્સાહ અને આશાનો સંચાર થયો. એકલતા રળિયામણા એકાન્તમાં પરિણમી રહી.  એક પછી એક પુસ્તકો લખાતા ગયા. ત્રણ પુસ્તકોને સાહિત્ય અકાદમી અને સાહિત્ય પરિષદ તરફથી એવોર્ડ પણ મળ્યા. છાપાઓમાં નિયમિત કોલમ પણ શરૂ થઇ. આમ સાહિત્યના ક્ષેત્રમાં સાવ અનાયાસે પદાર્પણ થયું એને જીવનનો ટર્નીંગ પોઇન્ટ  ન કહેવાય ? બાકી અમારી સાત પેઢીમાં કોઇને શબ્દો કે પુસ્તકો સાથે દૂર દૂરનો પણ કોઇ નાતો નહીં. અને આજે સાહિત્ય, પુસ્તકો મારું જીવન બની ચૂકયા છે.. સાહિત્ય તો  દરિયો છે પણ એક ટીપું બનીને એમાં ભળી શકાયું છે એનો આનંદ છે. શબ્દોએ જ મને નવું જીવન આપ્યું છે. અને હું  સભર બનીને જીવી ગઇ છું. જીવનસાથી હરીશનો પૂરેપૂરો સાથ, સહકાર અને પ્રોત્સાહન મારા ઉત્સાહને વધારતા રહ્યાં છે.  અનેક પરિચિત, અપરિચિત લોકોનો પણ હૂંફાળો સાથ અને સહકાર સાંપડયા છે.એ કંઇ ઓછા નસીબની વાત છે ?  મારી પાત્રતા કરતા ઇશ્વરે મને વધારે જ આપ્યું છે .બે વરસ પહેલાં પૂરા બાર મહિના  બે પગ અને એક હાથ પ્લાસ્ટરમાં રહ્યાં. ફ્રેકચર થતા રહ્યાં,  શારીરિક  મર્યાદાઓ આવતી ગઇ. ઓળંગાઇ તો નથી શકાઇ પણ એને મારી ઉપર હાવી પણ નથી થવા દીધી. શારીરિક તકલીફને લીધે અમુક કોલમ સામેથી બંધ કરવી પડી. પણ એનો ઝાઝો અફસોસ કર્યા સિવાય ગુજરાતથી દૂર બંગાળ અને ઓરીસ્સામાં પૂરો એક દાયકો  એકલા થઇ ગયાની કે શરીરની કોઇ ફરિયાદ  કર્યા સિવાય શબ્દોને સહારે જીવન જિવાતું રહ્યું.

સંતાનો અમેરિકામાં ડોકટર છે એથી મેડીકલ ક્ષેત્રે જે પણ નવી શોધખોળ થાય એનો લાભ લેવાય છે એ ઇશ્વરની કૃપા જ ને ?  જીવનમાં માણસો હમેશા મજાના મળ્યા છે એનો સંતોષ અને આનંદ છે. કદાચ જીવનની  સૌથી મોટી ખુશી જ એ છે.

છેલ્લા એક મહિનાથી ફરીથી ગુજરાતમાં, વતનમાં આવી શકાયું છે એનો આનંદ પણ ઓછો નથી. જીવનયાત્રામાં ઇશ્વર હમેશા સતત સાથે રહ્યો છે, દરેક સમયે માર્ગ મળ્યો જ છે. એક પછી એક દરવાજા એની કૃપાથી જ ખૂલતા રહ્યા છે.

આજે પણ અનેક શારીરિક મર્યાદાઓ અકબંધ છે. પણ સાથે સાથે અનેક સગવડો મળી છે, કોઇ આર્થિક, સામાજિક પ્રશ્નો નથી. સંતાનોનો સ્નેહ અમારી સાથે જ છે. ભૌતિક રીતે દૂર છીએ પણ મન જુદા નથી થયા એનો આનંદ છે. બધી જવાબદારીઓ પૂરી થઇ ચૂકી છે.વિદેશ જઇએ ત્યારે ડોકટર દીકરો આજે પણ પગ દબાવી આપે છે એથી વિશેષ બીજું શું જોઇએ ? દીકરીનો સ્નેહ તો હોય જ. જમાઇ અને વહુરાણીના પણ એવા જ સ્નેહથી સભર છીએ..એ જ તો જીવનની મૂડી છે જે અમારી પાસે મબલખ છે અને કદી ખૂટે એમ નથી.

હવે કોઇ મોટો ટર્નીંગ પોઇન્ટ આવે એવું લાગતું નથી. કોઇ પણ પળે જીવન પર ધ એન્ડનું પાટિયું લાગી જાય તો પણ માનસિક તૈયારી છે જ. મારી પોતાની શ્રધ્ધાંજલિ, મારી આખરી ઇચ્છાઓ પણ લખીને જાહેરમાં બ્લોગ પર મૂકી દીધી છે. કોઇ એવી ઇચ્છાઓ અધૂરી નથી. મરવાની કોઇ ઉતાવળ પણ નથી. ભરપૂર જીવવું છે, માણવું છે. પણ ઇશ્વરનું તેડું આવે તો કોઇ વિરોધ પણ નથી. પણ જીવન છે ત્યાં સુધી તો.. શાના દુઃખ ને શાની નિરાશા ? મુકુલે મુકુલે મુખરિત આશા,

નિયતિ કેરા અદભૂત પાસા..શ્રધ્ધાની નવ જાગી પિપાસા..

 

8 thoughts on “જીવન જયાંથી પુનઃ શરૂ થયું..

  1. એક ક્ષણમાં જીવન પલટાય જાય તેવા ઓચિંતા ટર્નીગ પોઈન્ટ ન આવે તે ઈશ્વરની કૃપા! મન ઓચિંતા ફેરફારો જલ્દી સ્વીકારી શક્તુ નથી અને પીડાના પૂર વહેવા લાગે. સુખ પણ ઓચિંતુ આવે તો જીરવવું અઘરું છે.

    Liked by 1 person

  2. ઈશ્વરની કૃપા ક્યારેક
    અપાર વરસે છે.
    અપરંપાર વરસે છે
    અનરાધાર વરસે છે
    બસ સદા
    આવી જ કૃપા
    વરસ્યા કરે સતત
    ને તમ શ્વાસ થી
    શબ્દ થઈ સ્નેહ છલક્યા કરે સતત
    ને અમે એમાં ભીજાતા રહીએ
    સતત
    નીલમ બેન ખૂબખૂબ અભિનંદન
    અને હાર્દિક શુભ કામનાઓ

    Liked by 1 person

  3. નીલમબેન, આપનું જીવન ઉપરનું ચિંતન સરસ શબ્દોમાં રજુ કર્યું છે એ પ્રેરક છે .

    આપને દિવાળી અને નવા વર્ષની શુભ કાનાઓ…………….

    Liked by 1 person

  4. એક ક્ષણમાં જીવન પલટાય જાય તેવા ઓચિંતા ટર્નીગ પોઈન્ટ ન આવે તે ઈશ્વરની કૃપા! મન ઓચિંતા ફેરફારો જલ્દી સ્વીકારી શક્તુ નથી અને પીડાના પૂર વહેવા લાગે.

    Liked by 1 person

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s