ચપટી ઉજાસ..125

હાક..છીંક…..

હમણાં તો મને ને જયને સ્કૂલે મૂકવા રોજ પપ્પા આવે છે. પપ્પા સાથે અમે કેટલી બધી વાત કરીએ છીએ.. જય પણ પપ્પા પાસે ગુડ બોય બની જાય છે. મને પણ પપ્પા સાથે બહું મજા આવે છે.

હું કંઇ હવે નર્સરીમાં નથી ભણતી. જય નર્સરીમાં ભણે છે અને હું લોઅર કેજી માં ભણું છું..એમ કહેવાય. જયને તો ખાલી રમવાનું જ હોય.. મારે તો એ.બી.સીડી. ને એવું બધું બોલવાનું પણ હોય..ને હવે અમારે એ બધું લખવાનું પણ શીખવાનું છે. આજે ટીચર શીખડાવતા હતા.

ત્યાં મારું ધ્યાન મારા કલાસની બહાર પડયું..

ઓહ.. બહાર તો વરસાદ આવતો હતો. ગયે વખતે હું ને ફૈબા વરસાદમાં કેવા નાહ્યા હતા. ઉપર આકાશમાંથી ઘણું બધું પાણી પડે એને વરસાદ કહેવાય..હવે તો મને બધી ખબર પડે છે. વરસાદમાં નહાવાની તો કેવી મજા આવે.

ટીચરનું ધ્યાન નહોતું. ત્યાં હું તો સીધી દોડીને કલાસની બહાર નીકળી ગઇ. ને વરસાદમાં નાઇ નાઇ કરવા માંડી. હસતા હસતા ફરવા લાગી.. મોઢું ખોલીને ઉંચે જોઇ ઉંપરથી પડતું પાણી પીવા માંડી.વાહ..મજા જ મજા..

ત્યાં તો ટીચર દોડીને આવ્યા અને મને ગાલ ઉપર એક ફટકારી દીધી.

‘ જૂઇ, તું આવી તોફાની કયાંથી થઇ ગઇ ? તું તો ડાહી છોકરી હતીને ? ગુડ ગર્લ હતી ને ?

‘ અરે, હું તો હજુ યે ગુડ ગર્લ જ છું.. હું કંઇ તોફાન થોડી કરતી હતી ? હું તો વરસાદ આવ્યો એટલે નહાવા આવી હતી.

હું આખી ભીની થઇ ગઇ હતી. ટીચર ખીજાયા, જો, આ શું કર્યું ? આખી ભીની થઇ ગઇ..હવે શું કરવાનું મારે ? કહેતા ટીચરે નેપકીનથી મને લૂછી દીધી. સારું છે હવે છૂટવાનો સમય થઇ ગયો છે..નહીંતર મારે ઉપાધિ થાત.

ટીચરે મને માર્યું એટલે હુ રડવા જેવી થઇ ગઇ હતી. રોજ તો ટીચર મારા વખાણ કરતા હોય છે..આજે મેં કંઇ તોફાન નહોતું કર્યું તો પણ મને મારી… છિ..ટીચર ગંદા છે..
મારે હજુ પણ વરસાદમાં જવું હતું. પણ મને કોઇએ જવા ન દીધી. ખાલી કલાસમાં બેસાડી રાખી. પછી ટીચર વરસાદનું ગીત કોઇક ગવડાવતા હતા.. પણ મને એ ગાવાની જરાયે મજા ન આવી. હું તો ચૂપચાપ બેઠી રહી. આમ પણ હવે મને થોડી ઠંડી લાગતી હતી. મારા દાંત તો કિચૂડ કિચૂડ એમ અવાજ કરતા હતા.
ટીચર એ જોઇને કહે,

‘ કોણે ડહાપણ કરવાનું કહ્યું હતું ? આટલા છોકરાઓ શાંતિથી ચૂપચાપ બેઠા હતા.અને તારાથી જ ન બેસાયું. આજે તારી ફરિયાદ કરવી પડશે.સ્કૂલમાં ડીસીપ્લીન તો હોવી જોઇએ કે નહીં ? આ કંઇ તમારું ઘર થોડું જ છે ? ટીચર તો કેટલું યે બોલતા હતા..પણ હુ સાંભળું તો ને ? મને મારે એનું કૉણ સાંભળે ?

પણ તે દિવસે ઘેર જઇને બહું મજા આવી. કેમકે હવે તો બહું જોશથી વરસાદ પડતો હતો. હું ને જયભાઇ બંને વરસાદમાં નાહતા હતા.. દાદીમા સૂઇ ગયા હતા. ખાલી મમ્મી જ હતી ઘરમાં..એણે અમને નહાવા દીધા. જૂઇ, થોડીવાર હોં..પછી શરદી થઇ જશે..

શરદી ? આ વળી નવું નામ.. એ શું હશે ?

ત્યાં મને જોશથી છીંક આવી..

મમ્મી કહે, ‘ જો શરદી થઇ કે શું ? ‘

ઓહ… એટલે છીંક આવે એને શરદી થઇ એમ કહેવાય.. ! એ તો મને ઘણીવાર આવતી હતી. ને પાછી જતી રહેતી હતી..આજે પણ જતી રહેશે..

પણ આજે તો છીંક ચાલુ જ રહી.

એ સાંભળીને મમ્મી કહે, જૂઇ, હવે અંદર આવતી રહે..જો તને કેટલી છીંકો આવે છે..
પણ મને છીંક આવે છે એમાં મમ્મીને શું વાંધો ?

મેં જય સામે જોયું. એ તો આરામથી ગોળ ગોળ ફરતો હતો. ત્યાં એક નાનકડું બિલ્લીનું બચ્ચું આવ્યું હતું એને પાણી ઉડાડતો હતો. મેં દોડીને બચ્ચાને ઉપાડી લીધું.. એ ધ્રૂજતું હતું. મેં મારું ફ્રોક કઢીને ત્યાં મૂકી દીધું હતું. એ લઇ આવી એને ઓઢાડી દીધું. બિચારું નાનકું બચ્ચું.. એની મમ્મી કયાંય નહોતી દેખાતી.

હું એને ઉપાડીને અંદર ઘરમાં આવી.

ત્યાં મમ્મી મારો ટુવાલ અને બીજા કપડાં લઇ આવી.
‘ અરે, જૂઇ, હાથમાં આ શું છે ?

મેં ફ્રોક ઉપાડીને મમ્મીને બતાવ્યું. મમ્મી હસી પડી.. તારું ફ્રોક એને ઓઢાડયું છે ? ઉભી રહે, લે..આ કપડું એને ઓઢાડી દે..

મમ્મીએ કોઇ કપડું આપ્યું. મેં એને એ ઓઢાડી દીધું..ને તેડી લીધુ.

‘ અરે, પહેલા તું તો કપડાં બદલ..કહીને મમ્મીએ મને લૂછી દીધી..અને કપડાં બદલી આપ્યા..હું જાતે પહેરવા જતી હતી ત્યાં મમ્મી કહે,

‘ અત્યારે નહીં .તને વાર લાગશે..લાવ, હું જલદી જલદી પહેરાવી દઉં.. ને જય, હવે તું પણ અંદર આવતો રહે. દાદીમા જોશે ને તો તને ને મને બંનેને ખીજાશે..

પણ એમ જય કંઇ કોઇનું સાંભળે એવો થોડો છે ?

હું તો હાથમાં બિલાડીનું બચ્ચું લઇને છીંકાછીંક કરવામાં પડી હતી. ને બચ્ચું ધીમે અવાજે મ્યાઉં..મ્યાઉં કરતું રહ્યું.

( જનસત્તા.. લોકસત્તામાં પ્રગટ થતી કોલમ )

One thought on “ચપટી ઉજાસ..125

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s