સારા સમાચાર…
ફોન પર ત્રાટક કરતી હોય તેમ આરતી તેની સામે જોતી બેઠી હતી.. હમણાં અનૂપનો ફોન આવવો જ જોઇએ. મનમાં એક ચિંતા, ભય, આશંકાનો ઓથાર….શું આવશે રીપોર્ટ ? કંઇ માઠા સમાચાર તો નહીં હોય ને ? પણ..બહું રાહ ન જોવી પડી. ફોનની એક જ રીંગ…અને આરતીએ ઝાપટ મારી..
’ શું થયું અનૂપ ? રીપોર્ટ શું આવ્યો ? બધું બરાબર છે ને ? કંઇ ચિંતા જેવું નથી ને ? ‘ એકી સાથે પ્રશ્નોનો મારો…
સામે છેડે મૌન..
’ અનૂપ, પ્લીઝ કંઇક બોલ તો ખરો..’
શું બોલું ? ‘
એક ધીમો અવાજ… અને બે ચાર ડૂસકાં…’
અનૂપ…ભાઇ, બોલ તો ખરો…શું આવ્યો મમ્મીનો રીપોર્ટ ? ‘
બે ચાર સેકન્ડ પછી ધ્રૂજતો એક અવાજ….’ આરતી, મમ્મીને..મમ્મીને….લ્યુકેમિયા..બ્લડ કેન્સર…અને તે પણ લાસ્ટ સ્ટેજમાં…’
ડૂસકાનો અવાજ હવે બંને છેડે…આગળ શું બોલવું તે કદાચ કોઇને સમજાતું નહોતું.
’ ભાઇ, કશું થઇ શકે તેમ નથી ? ‘
એવું શકય હોય તો હું બાકી રાખું ખરો ? એક તો મમ્મીની ઉમર…આટલી વીકનેસ…અને આ રીપોર્ટ..કેમોથેરાપી પણ આ કેઇસમાં શકય નથી…
’’ કોઇ ઉપાય ? ‘
’
કોઇ જ નહીં…બસ..આપણાથી થાય તેટલી સેવા કરી લઇએ..અને મમ્મીની બાકી રહેલી જિંદગીની દરેક ક્ષણ ખુશીથી ભરી દઇએ..પપ્પાએ તો કશું કરવાનો કોઇ મોકો નહોતો આપ્યો….હવે મમ્મીની સ્થિતિની આપણને જાણ થઇ છે તો સેવા કરવાની તક મળી છે એમ પોઝિટીવ લઇએ..એ એક માત્ર આપણા હાથની વાત..બાકી કશું નહીં….અને તે પણ વધુમાં વધુ પંદર દિવસ….’
આરતીએ ફોન મૂકયો અને શૂન્યમનસ્ક થઇ ગઇ.અંતે શંકા સાચી નીકળી. ભાઇ ખુદ ડોકટર હતો…શકય તે બધું કરી છૂટવાનો જ..પૈસાની કોઇ કમી નહોતી. તેથી બીજો કોઇ સવાલ નહોતો.
આરતી તુરત પિયર પહોંચી ગઇ. ઓસ્ટ્રેલિયાથી નાની બહેન, અવની પણ આવી પહોંચી. રીપોર્ટ મુજબ મમ્મી પંદર વીસ દિવસોથી વધારે કાઢે તેમ નહોતા.છેલ્લે છેલ્લે જે થોડા દિવસો મમ્મી સાથે રહેવા મળ્યું..કે જે સેવા થઇ શકે તેટલી કરી લઇએ જેથી પાછળથી વસવસો ન રહે.
બધાએ મળીને નક્કી કર્યું કે મમ્મીને તેમના રોગનો ખ્યાલ સુધ્ધાં નથી આવવા દેવાનો.. મમ્મીની જીજીવિષાથી તેઓ અજાણ નહોતા જ. મોત પહેલા જ તેમને મોતની પીડા આપવાનો કોઇ અર્થ નથી. મમ્મીને સમજાવી દીધું કે તમારા લોહીમાં ઇનફેક્શન થઇ ગયું છે. તેથી જરૂર પડે તમને લોહી આપતું રહેવું પડશે. પછી તમને સારું થઇ જશે..કહેતાં કહેતાં અનૂપની આંખો છલકી હતી. બંને બહેનો ધ્રૂસકુ છૂપાવવા બાથરૂમમાં દોડી ગઇ હતી.અનૂપની પત્ની વિરાજ સાસુનો હાથ પકડી ચૂપચાપ બેઠી રહી.
‘બેટા, તું ડોકટર છે તેથી મારે બીજી શું ચિંતા હોય ? તું જે કહે કે કરે તે બરાબર જ હોય ને ?
અલોપાબેને વિશ્વાસથી કહ્યું. પછી તો તેમનું સમયપત્રક ગોઠવાઇ ગયું. આરતી અને અવનીએ મમ્મીને સમયસર દવા આપવાની, ખાવા પીવાની સંભાળ રાખવાની બધી જવાબદારી લઇ લીધી
‘ ભાભી, આજે મમ્મી માટે થોડો બદામનો શીરો બનાવજો.
વિરાજ ચૂપચાપ શીરો બનાવીને નણંદના હાથમાં ડીશ મૂકી દેતી.
આરતી માને ચમચીથી શીરો ખવડાવતા કહેતી,
‘ ભાભી, લાવો તો મમ્મીની દવા અને પાણી..મમ્મીની દવાનો સમય થઇ ગયો. વિરાજ દવા આને પાણીનો ગ્લાસ લઇને રસોડામાંથી દોડી આવતી. આરતી માને દવા પીવડાવતી. અવની, તું યે મમ્મીની દવાનો સમય યાદ નથી રાખી શકતી ? એ પણ મારે એકલીએ જ કરવાનું ? સારું છે હું સમયસર હાજર છું.. નહીંતર તમારા કોઇનો ભરોસો કયાં કરાય તેમ છે ? ભાભી, સાંજે બરાબર સાત વાગ્યે દવા આપવાની છે..એ યાદ રહેશે ને ?
જવાબ આપવાની વિરાજને કે જવાબ સાંભળવાની આરતીને ટેવ જ કયાં હતી ?
અવની, મમ્મીનું ધ્યાન આપણે જ રાખવાનું છે. વહુને સાસુની કેટલીક પડી હોય ? આપણી તો જનેતા છે. ‘
મોટે ભાગે સવારે અને સાંજે અલોપાબેનના પગે ભયંકર દુખાવો ઉપડતો.
’ ભાભી, મમ્મીના પગ દુખે છે. થોડીવાર દબાવી આપો તો તેમને સારું લાગે. છેલ્લે છેલ્લે સાસુની સેવા કરવાનો મોકો મળ્યો છે. તો લહાવો લઇ લો.. મારા નસીબમાં તો એ સેવા નથી. મારા પોતાના શરીરના જ ઠેકાણા નથી. મમ્મીના પગ દબાવીશ તો મારા હાથ દબાવવાનો વારો આવશે.અને અવની તું મમ્મીને ગમતી કેસેટ ચાલુ કર તો બહેન..’
આરતીની એક કે બીજી સૂચનાઓ આખો દિવસ ચાલુ રહેતી. કેમકે એ મોટી દીકરી હોવાથી મમ્મીની સંભાળની બધી જવાબદારી તેણે લીધી હતી
વિરાજ પૂરા ભાવથી અલોપાબેનના પગ દબાવતી રહેતી. અવની કેસેટમાં ભજન ચાલુ કરતી.
રાત્રે અનૂપ આવે એટલે આખા દિવસનો અહેવાલ આરતી આપતી. અને ઉમેરતી
‘ ભાભી, દિવસ આખો તો અમે બંને બહેનો મમ્મીને સંભાળી લઇએ છીએ.. હવે રાત્રે તમારો વારો. રાત્રે મારાથી ઉજાગરા નથી થતા..નહીંતર મમ્મી પાસે હું જ સૂત. પણ શું થાય ? પછી વળી મારી તબિયત બગડે તો અત્યારે બીજી ઉપાધિ.. એટલે અત્યારે તો મારે પહેલા મારી તબિયત સાચવવી રહી. ભાઇ બિચારો કેટલેક પહોંચે ? માનું કરશે કે બહેનનું ?
મને તો જોકે તબિયતનો કોઇ પ્રશ્ન નથી.. પણ મને બીક લાગે. રાત્રે કંઇ જરૂર પડે ને મમ્મીને કંઇ થાય તો ? મારાથી તો સહન જ ન થાય. અમારી તો મા છે ને ? દિવસ આખો મમ્મી દીકરીઓના ચાર્જમાં અને રાત્રે ભાભીને સેવાનો લાભ આપીએ..મમ્મી ઉપર એમનો યે થોડો હક્ક તો ખરો ને ? આ તો પુણ્ય કમાઇ લેવાનો અવસર છે ભાઇ.. ‘ અવની ઉમેરતી.
હમણાં કામવાળા બેન પણ રજા ઉપર હતા. એક છૂટક નોકર વાસણ અને ઝાડુ પોતા કરી જતો.
દિવસના વિરાજનો મોટા ભાગનો સમય રસોડામાં જ પસાર થતો. આરતીનો સાદ આવતો રહેતો. . ભાભી, મમ્મી માટે જયુસ બનાવો છો તો અમારા બંને માટે પણ ભેગાભેગ જ બનાવી લેજો. અત્યારે બધાનું જુદું જુદું કરવા કયાં બેસીએ ?
વિરાજ રાત્રે સાસુના રૂમમાં જ સૂઇ રહેતી. રાત્રે અલોપાબેનને કેમે ય ઉંઘ ન આવતી. શરીર જાણે તૂટતું હતું. વિરાજ ઘડીક હાથ તો ઘડીક પગ હળવા હાથે દબાવે. કદીક માથા પર..વાંસામાં હાથ ફેરવી રહે. કદીક સાસુને ગમતા ભજનની કોઇ કડી ગાતી રહે. અલોપાબેન સંતોષ પામીને સૂઇ જાય.
‘ બેટા, તું સૂઇ જા..હવે .હું સૂવાનો પ્રયત્ન કરું છું.’ ’ મમ્મી, મારી ચિંતા ન કરો.’ ઓછાબોલી વિરાજ ધીમા અવાજે કહેતી.
અલોપાબેનનું શરીર સાવ લેવાઇ ચૂકયું હતું. ખોરાક પણ નામ માત્રનો જ લઇ શકતા હતા. પરંતુ તેમની જિજિવિષા ખૂબ પ્રબળ હતી. વીલપાવર મજબૂત હતો. વરસોથી પોતે ખૂબ સક્રિય રહ્યા હતા. અનેક સંસ્થાઓ સાથે જોડાયેલા હતા. હવે બહાર નહોતા જઇ શકતા તેથી ફોન પર વાતો કર્યા કરતા. સલાહ, સૂચના આપતા રહેતા.
આજે અલોપાબેનનો જન્મદિવસ હતો. બધાએ ધામધૂમથી જન્મદિવસ ઉજવવાનું નક્કી કર્યું હતું. ઘરમાં બધાને જાણ હતી કે મમ્મીનો આ છેલ્લો જન્મદિવસ છે. આમ તો દર વખતે આવી કોઇ ખાસ ધામધૂમ નહોતા કરતા. પરંતુ હવેની વાત અલગ હતી. જિન્દગીના સમીકરણો બદલાયા હતા. દ્રષ્ટિ બદલાઇ હતી.
મમ્મીનો રૂમ ફૂલોથી મઘમઘી ઉઠયો. અલોપાબેને કેક કાપી. ને મીણબત્તી ઓલવી ત્યારે બધાની આંખો ભીની બની ઉઠી. આમ જ હવે જીવનની મીણબત્તી ઓલવાવાને પણ કયાં વાર હતી ? કાળની એક જ ફૂંક અને…..બસ ..કઇ પળ આવશે અને…..?
આરતી અને અવનીએ મમ્મી માટે નવી સાડી લીધી હતી. આજે તે જ સાડી મમ્મીને પહેરાવી. વિરાજે સાસુના જૂના ફોટાઓનું એક અલગ આલ્બમ તૈયાર કરી..તે દરેક ફોટાની નીચે કશુંક સરસ લખીને સાસુને આપ્યું હતું. અલોપાબેન નવી સાડી પહેરી આલ્બમમાં કેદ થયેલી સુખદ સ્મૃતિઓ જોતા આખા કોળી ઉઠયા હતાં. દસ વરસના પૌત્ર અને સાત વરસની પૌત્રીએ “ હેપી બર્થ ડે ગ્રાંડમા “ ગાઇને રૂમ ગજાવી મૂકયો. બાળકોને તો આમ પણ બીજી કોઇ ખબર નહોતી. અલોપાબેન ખુશખુશાલ… માન્દગી આવી તો બાળકોએ પોતાના માટે સમય કાઢયો. નહીંતર તો બધા રોજના કામોમાં જ વ્યસ્ત રહેતા હતા. પુત્રીઓ પણ કયારેય નિરાંતે રહેવા આવી શકતી નહોતી.
એક દિવસ અમોલાબેનને ઘરમાં સત્યનારાયણની કથા કરવાનું મન થયું. આમ તો ગયા વરસથી મન હતું. પરંતુ ગયા વરસે અનૂપે ચોખ્ખી ના પાડી દીધી હતી.
’ એવા બધા તૂત કરવાની કોઇ જરૂર નથી.. એ બધા ક્રિયાકાંડ બકવાસ છે એમાં હું માનતો નથી. ‘ અમોલાબેન કશું બોલી નહોતા શકયા. આ વખતે ફરી એકવાર મન થઇ ગયું. કદાચ પુત્ર હા પાડે તો ? હમણાં ઘણું ન ગમતું પણ પુત્ર કરતો હતો. તેથી તેમના મનમાં થોડી હિમત આવી. ડરતાં ડરતાં ધીમેથી પુત્રને કહી જોયું.
‘ અરે,મમ્મી, એમાં શું મોટી વાત છે ? કાલે જ કરીએ…કરવું જ છે તો મોડું શા માટે ?
‘બહેન સામે જોતા અનૂપે કહ્યું. બહેને ધીમેથી માથુ હલાવ્યું.બીજે જ દિવસે બધી વ્યવસ્થા થઇ ગઇ. અને ખૂબ સરસ રીતે કથા સંપન્ન થઇ. અમોલાબેન આ માન્દગીનો લાખ લાખ ઉપકાર માની રહ્યા. જેને લીધે તેમને પોતાના સંતાનો ફરીથી મળ્યા હતા. કયારેય ન ધારેલું બધું થતું હતું. અમોલાબેનનો પડયો બોલ ઝિલાતો હતો.
આમ ને આમ પંદર દિવસને બદલે એક મહિનો પસાર થઇ ગયો. ધાર્યા કરતાં અમોલાબેનની તબિયત ઘણી સારી હતી. સુધારો તો જોકે નહોતો થયો. પરંતુ બગડયું પણ નહોતું. પહેલી વખત રીપોર્ટ જોઇ અનૂપને થયું હતું કે મમ્મી માંડ થોડાં દિવસો કાઢી શકશે. પરંતુ ધાર્યા કરતા બધું લંબાયુ હતું. અને હવે લંબાતું જશે એવું લાગતું હતું. અલબત્ત સાજા થવાના…આમાંથી ઉભા થવાના કોઇ ચાંસીસ નહોતા જ. પરંતુ ઘણીવાર ઘણાં દર્દીઓ આમ જ પથારીમાં જ લાંબો સમય ખેંચી નાખતા તેણે કયાં નથી જોયા ?
ભાઇ, શું લાગે છે ? મારે બે મહિના પછી દીકરાના લગ્ન લીધા છે. લગ્નમાં કંઇ વિઘ્ન તો નહીં આવેને ?
મને શું ખબર ? કંઇ મારા હાથમાં બધું થોડું છે ? અનૂપે થોડી અકળામણથી જવાબ આપ્યો.
મારે પણ વેકેશનની ટિકિટો બુક થઇ ગઇ છે..પણ..
ભાઇ, મારે પણ જવું પડશે. ત્યાં હિતેનને જમવાની તકલીફ પડે છે.
અહીં તો ધાર્યા કરતા બધું લંબાતું જતું હતું. અંતે જરૂર પડશે તો પાછા આવીશું આવીશ એમ કહી બંને બહેનો ગઇ. આમ બેસી રહીને કયાં સુધી સમય બગાડે ?
રોજ બહેનોના ફોન આવતા રહેતા.
‘ ભાઇ, મમ્મીને કેમ લાગે છે હવે ? ‘
’ નવું કશું નહીં. જેમ છે તેમ જ ચાલે છે.
અનૂપના અવાજમાં રણકો નહોતો.
અમોલાબેન કદીક દીકરીઓને આવવાનો આગ્રહ કરતા રહેતા
.’ મમ્મી, તને ખબર છે ને નિશાંતની સ્કૂલ હોય ત્યારે નીકળવું મારા માટે કેવું અઘરું બની રહે ? વળી હમણાં જ રોકાઇ ગઇ ને તારી પાસે ? હવે ફરીથી અનુકૂળતાએ જરૂર આવી જઇશ. મારો યે જીવ બહું ખેંચાય છે. પણ શું કરું ? મારે તો બધી બાજુનું જોવું ને ? પછી ધીમેથી ઉમેરતી ખરી…અને હા, દવા બરાબર લેજે..અને જયુસ ન ભાવે તો પણ પીવાનો. તબિયતનું ધ્યાન રાખજે. ભાભી, તારું ધ્યાન તો બરાબર રાખે છે ને ? ‘
‘ બેટા, મને નથી લાગતું કે હું આમાંથી હવે ઉભી થાઉં. હવે થાકી ગઇ હું તો..’
’ ના, ના , મમ્મી એવું કંઇ નથી…’
’ મને સારું તો થઇ જશે ને ? ‘ નરી નિર્દોષતાથી અમોલાબેન પૂછી રહેતા.
’ હા, મમ્મી , સારું થઇ જશે..’ બોદો અવાજ આવતો, પરંતુ અમોલાબેનને ખ્યાલ ન આવતો. સંતોષનો શ્વાસ લઇ પૂર્ણ વિશ્વાસથી તે ફરીથી સૂઇ જતા. કે સૂવાનો સફળ, નિષ્ફળ પ્રયત્ન ચાલતો રહેતો.
‘ ભાઇ, લગ્નની તૈયારી કરું ને ? વાંધો નહીં આવે ને ? ‘
’
મને શું ખબર પડે ? હું કંઇ ભગવાન છું ? અનૂપ ચીડાઇ જતો. મારે પણ બધી ટિકિટો બુક થઇ ગઇ છે. હું કોને કહું ? ‘
વાતાવરણ ધીમે ધીમે તંગ થતું જતું હતું. વહુ ચૂપચાપ..મૌન બની સાસુના કૃશ થઇ ગયેલા ડિલે હાથ પસવારતી રહેતી.
નાની બહેને પણ કહી દીધું હતું કે એમ ધક્કા ખાવા મને ન પોસાય..હું આવું ને આમ ને આમ ખેંચાયા કરે તો મારે તો સમય થાય એટલે જવું જ પડે. “ કંઇક સમાચાર” હોય તો મને કહેજો..હું તુરત નીકળી જઇશ.’
અનૂપ અકળાય છે. બધાને “ સારા “ સમાચાર જોઇએ છે. જાણે કેમ બધું મારા હાથમાં હોય ? એક વિરાજ સિવાય બધાની ધીરજ જાણે ખૂટી ગઇ હતી. અંદર સતત એક અવઢવ…..પણ અંતે એ અવઢવમાંથી ઇશ્વરે જ મુકત કર્યા.
એ રાત્રે આસપાસ કોઇ નહોતું. વહુનો હાથ પરમ સ્નેહથી સાસુને માથે ફરતો હતો. અલોપાબેને સંતોષથી વહુ સામે અંતિમ દ્રષ્ટિ નાખી. બે પાંચ ક્ષણો સાસુ, વહુ એકમેક સામે જોઇ રહ્યા.અને…. અમોલાબેને બધાને મુક્તિ આપી દીધી. વહુની આંખોમાં વાદળો છવાયા. અને ભાઇએ બહેનોને “ સારા સમાચાર “ આપ્યા.
બહેનો દોડતી આવી પહોંચી. હૈયાફાટ રૂદન…
’મમ્મી, આટલી જલદી તું અમને છોડીને ચાલી ગઇ ? ‘
ડૂસકા સાથે નાની બહેન બોલી નહોતી શકતી. અમોલાબેનને પલંગ પરથી નીચે લેવાયા. ઘીનો દીવો થયો. નવીનક્કોર સાડી ઓઢાડાઇ. સુવાસિત ગુલાબના પુષ્પોથી અમોલાબેનનું શરીર મઘમઘી ઉઠયું.
‘ ભાભી, મમ્મીના કાનમાંથી હીરાની બુટ્ટી, અને બધા દાગીના કાઢી લો..’
’ ના, તમે જ કાઢો..મારું ગજુ નહીં. ’
’ દીકરી થઇને અમારું મન કેમ માને ? તમે તો પારકી જણી છો. અમારી તો મા હતી. મારો તો હાથ લગાડતા પણ જીવ ન ચાલે..તમે વહુ છો તમારી ફરજ કહેવાય.. ‘
વહુએ નણંદ સામે નજર નાખી.
સાસુને જરા પણ દુ:ખે નહીં એનું ધ્યાન રાખી પારકી જણીએ પરમ મૃદુતાથી..હળવે હળવે સાસુના નિર્જીવ શરીર પરથી ઘરેણા ઉતાર્યા. અંતર થડકી ઉઠયું. આંખોમાં ભીનાશ ઉતરી આવી.
‘ સહેજે બે લાખ રૂપિયાના તો થાય જ ‘ દાગીના સામે એકીટશે જોઇ રહેલી પુત્રીના મનમાં અંદાજ મંડાઇ ગયો.
’ લાવો, કબાટમાં સાચવીને રાખી દઉં.’ દીકરીએ હાથ લંબાવ્યો.
વિરાજે ચૂપચાપ દાગીના તેના હાથમાં મૂકયા.
બહેને આંસુથી છલકતી આંખે માના દાગીના લીધા. ભાવથી કપાળે અડાડયા.મનમાં વિચાર ઝબકી ઉઠયો.
’ કેવી સરસ ડીઝાઇન છે. હવે તો આવી ડીઝાઇન જોવા પણ ન મળે. લગ્નમાં પહેરીશ તો બધા જોતા રહી જશે.’
આસપાસ નજર ફેરવી..કોઇ સાંભળી તો નથી ગયું ને ?
થોડાં ડૂસકાઓ સાથે બહેને દાગીના કબાટમાં મૂકયા.કબાટ લોક કર્યો અને ચાવીનો ઝૂડો કમરે ખોસ્યો. સગાઓ આવ્યા. ભાઇ બહેનોએ મમ્મીની કેટલી..કેવી રીતે રાત દિવસ ઉજાગરા કરીને સેવા કરી તે કહેતા આરતી કે અવની થાકતા નહોતા.
’ અમે કોઇ ક્રિયામાં માનતા નથી. તેથી કોઇ વિધિ કરવાના નથી. અનાથાશ્રમ કે વૃધ્ધાશ્રમમાં જે આપવું હશે તે આપી દેશું.’
ત્રીજે જ દિવસે સગાઓ બધા વિખેરાયા.
તે રાત્રે ભાઇ અને બંને બહેનો બેઠી હતી. ત્યાં મોટી બહેને કહ્યું,
’ ભાઇ, મારાથી હવે વધારે રોકાવાશે નહીં. મા વિના અહીં રોકાઇને શું કરું.? કયાંય મન નથી લાગતું મમ્મી જ યાદ આવ્યા કરે છે. આંખો લૂછતા આરતીએ કહ્યું. ‘
’ અને હું પણ બહેન સાથે જ નીકળી જઇશ. આવી જ છું તો થોડું જરૂરી શોપીંગ કરવાનું છે તે આજે પતાવી લઇશ. ગમે કે નહીં બધું કર્યે જ છૂટકોને ? માની ખોટ તો થોડી પૂરાવાની છે ? ’
અનૂપે ચૂપચાપ ડોકું હલાવ્યું.
’ ભાઇ, હું સૌથી મોટી છું. તો મમ્મીના દાગીના અને બધી વસ્તુઓ ઠેકાણે પાડવાની જવાબદારી મારે જ લેવી રહીને ? હું છું ત્યાં એ કામ પતાવી લઇએ. પછી તારે કોઇ ચિંતા નહીં.
આમ તો છેલ્લે આવી હતી ત્યારે જ મમ્મીએ બધું મારી પાસે લખાવ્યું હતું. મમ્મીની ઇચ્છા મુજબ જ આપણે તો કરવાનું રહ્યું ને ? તેમના આત્માને શાંતિ મળે એ જ હવે તો આપણે જોવું રહ્યું. ગળગળા અવાજે મોટી બહેન માંડ બોલી શકી.
ધીમેથી બહેને પર્સ ખોલ્યું. મમ્મીનો કાગળ કાઢયો..
‘ લે, હું જ મોટેથી વાંચી સંભળાવું. પછી તને આપું. ‘
’ બહેન, આ તો મમ્મીના અક્ષર નથી.’ ભાઇએ ધીમેથા કહ્યું.
’ અક્ષર તો મારા જ હોય ને ? મમ્મી કંઇ લખી શકે એવી તાકાત બિચારામાં કયાં બચી હતી ? એ બોલતા ગયા અને હું લખતી ગઇ. મારા યે હાથ ધ્રૂજતા હતા. પણ શું કરું ? મોટી મૂઇ છું તો કરવું જ રહ્યું ને ? તમે બધા તો નાના છો..અમને ખબર ન પડે કહીને છટકી જાવ..મારે તો ન ગમે તો યે કરવું જ રહ્યું ને ? ‘
રડતા અવાજે બહેને મમ્મીનો છેલ્લો કાગળ વાંચ્યો ત્યારે બધાને જાણ થઇ કે મોટી દીકરીએ મમ્મીની ખૂબ સેવા કરી છે તેથી મોટા ભાગનું બધું તેને આપ્યું છે. બે ચાર વસ્તુઓ નાની બહેનને આપી છે. વહુને પ્રસાદી તરીકે પોતે પહેરતી હતી તે તુલસીની કંઠી આપી છે.
‘લે ભાઇ, વાંચ…’ ભાઇએ કાગળ હાથમાં લીધો. અછડતી નજર ફેરવી. કશું બોલ્યા સિવાય પત્નીના હાથમાં મૂકયો.’
પત્નીએ હાથ ન અડાડયો.તેની ધૂંધળી નજર સાસુના ફોટા પર સ્થિર થઇ હતી.
નાની બહેન કશુંક બોલવા જતી હતી પણ ત્યાં….
મોટી બહેનનો આંસુભીનો સાદ આવ્યો.
‘ મમ્મીને જે ઠીક લાગ્યું એ તેણે કર્યું. મા જેવી મા ગઇ..હવે દાગીનાને શું કરવાના ? મા, અમને કોઇને દાગીનાનો મોહ નથી. પણ આપણને ગમે કે ન ગમે મરનારની આખરી ઇચ્છાને માન આપવું જ રહ્યું ને ? મા, બધું તારી અંતિમ ઇચ્છા મુજબ જ થશે. બસ ? ‘
” મમ્મી…” કહેતાં મોટી બહેન ધ્રૂસકે ધ્રૂસકે રડી રહી.
તસ્વીરમાં સમાઇ ગયેલા અમોલાબેન કશુંક બોલ્યા પણ કોઇને સંભળાયું નહીં.
બે દિવસ પહેલા સાસુએ જાતે લખી આપેલો કાગળ વિરાજના બ્લાઉઝની ભીતર સળવળી ઉઠયો.. વિરાજે હળવેથી છાતીને સ્પર્શ કર્યો. એક સુવાસભરી હૂંફ તેને ઘેરી વળી.
( નવનીત સમર્પણ 2012 મે ના અંકમાં પ્રકાશિત મારી વાર્તા )
આ તો ઘર ઘરની વાત.મૃતના અંગુઠા પાડી દસ્તાવેજ કરતા પણ જોયા છે .હવે તો આ અંગે જાગૃત કરવા બધાએ અભ્યાસ કરવો જ રહ્યો…વસિયતનામું બનાવતી વખતે શું ખ્યાલમાં રાખશો
કોઈ પણ વ્યક્તિ માટે પોતાનું વીલ કે વસિયતનામું બનાવવું સરળ છે. વસિયતનામું બનાવવાના સંદર્ભમાં નીચે જણાવેલ મુદ્દા ધ્યાનમાં રાખવા જેવા છેઃ
(૧) વસિયતનામું સાદા કાગળ ઉપર કરી શકાય છે. અને તે માટે કોઈ ‘સ્ટેમ્પ પેપર’ કે ‘લીગલ પેપર’ની જરૃર નથી.
(૨) વસિયતનામું તૈયાર કરવા માટે કોઈ કાયદાકીય ભાષાના પ્રયોગની જરૃર નથી. વસિયતનામું બનાવનાર વ્યક્તિની ઇચ્છા સ્પષ્ટ અને સમજી શકાય તેવી સાદી અને સરળ ભાષામાં રજૂ કરવામાં આવે તે ઇચ્છનીય છે.
(૩) વસિયતનામું તૈયાર કરવા સંબંધી સૌથી મહત્ત્વની બાબત એ છે કે વસિયતનામાના અંતમાં વસિયત બનાવનાર વ્યક્તિએ (વસિયતકારે) ‘એટેસ્ટેશન’ સ્વરૃપે બે સાક્ષીઓની ઉપસ્થિતિમાં પોતાની સહી કરવી જોઈએ. સાક્ષીઓએ સહી કરતી વખતે વસિયતનામાની વિગતો જાણવી કે વાંચવી જરૃરી નથી. વસિયતનામા હેઠળ જેને લાભ મળવાનો હોય તેવી વ્યક્તિની સાક્ષી તરીકે સહી ન લેવામાં આવે તો તે સલાહભર્યું ગણાય.
(૪) વસિયતકાર વસિયતનામાના દરેક પાનાની નીચે પોતાની સહી કરે તે સલાહભર્યું બની રહે. આ ઉપરાંત વસિયતનામામાં સુધારા- વધારા કે છેકછાક કરવામાં આવે, તો આવા સ્થળે અથવા સામે ર્ માર્જીનમાં વસિયતકાર તેમ જ સાક્ષીઓએ ટૂંકમાં સહી કરવી જરૃરી છે. અલબત્ત, જો વસિયતનામામાં વધારે પડતી છેક-છાક કે સુધારા- વધારા કરવા જરૃરી હોય તો તે સંજોગોમાં વસિયતનામું નવેસરથી તૈયાર કરાય તે હિતાવહ ગણાય. ઉપર જણાવ્યા મુજબ વ્યક્તિ પોતે ચાહે તેટલીવાર પોતાનું વસિયતનામું બદલી શકે છે? અને નવું વસિયતનામું બનાવવામાં આવતાં જૂનું આપોઆપ રદ થયેલું ગણાય છે.
(૫) વીલ યા વસિયતનામાનું ‘રજિસ્ટ્રેશન’ અર્થાત્ નોંધણી કરાવવી જરૃરી નથી. અલબત્ત, વસિયતનામાની કાયદેસરતા પડકારવામાં આવે તેવા સંજોગો ઊભા થવાનો વસિયતકારને સંશય હોય ત્યારે વીલનું ‘રજિસ્ટ્રેશન’ અથવા નોટરી પબ્લિક સમક્ષ ‘નોટરાઇઝેશન’ કરાવવાનું વિચારી શકાય. આવા સંજોગોમાં વીલના અંતમાં સાક્ષીઓની સહી ઉપરાંત, વ્યક્તિના ફેમિલી ડોક્ટરની સહી અને વ્યક્તિનાં તન અને મનની દુરસ્તતાનું પ્રમાણપત્ર આવરી લેવામાં આવે તો તે સલાહભર્યું બની રહે.
LikeLike
very touchy story didi.. ketli sadi -saral bhasha ma ketli moti vaat kahi gaya tame…amazing..!
LikeLike
નિલમબહેન,
ખરેખર હદયસ્પર્શી વાર્તા લખી છે… બિચારી વહુએ સાસુની સાચ્ચા મનથી સેવા કરી અને એને જ કાંઇ ના મળ્યું…
LikeLike
નીલમબહેન,
નવનીત-સમર્પણમાં જ આ વાર્તા વાંચી છે. ખૂબ જ ગમી.
ધન્યવાદ.
LikeLike
aa story ; TV serial ; most appropriate lage che ……..DHANYAVAD ;
LikeLike
A very touching story Ma..
LikeLike