કલમ વાચકોની…

મિત્રો,
નમસ્કાર..સામાન્ય રીતે પરમ સમીપે પર મારી રચનાઓ મૂકતી રહું છું..પરંતુ એવો કોઇ નિયમ નથી જ..ઘણી વખત અન્ય લેખકો..કવિઓની પણ મને ગમતી કૃતિઓ મૂકી જ છે…ગમતાનો ગુલાલ….

આજથી પરમ સમીપે પર અમુક વાચકો..ભાવકોની લાગણી..માગણીને ધ્યાનમાં રાખીને એક નવો વિભાગ ચાલુ કરેલ છે..” કલમ વાચકોની “..
સમયાંતરે એમાં વાચકોની કૃતિ મૂકીશ..કોઇ પણ વાચકને ઇચ્છા થાય તો મને એમની રચના( ગદ્ય, પદ્ય કે સાહિત્યના કોઇ પણ સ્વરૂપમાં ) મોકલી શકે છે…
ઘણાં ઉત્તમ ભાવકો પાસે અન્યને આપવા લાયક ઘણું હોય છે. એ અહીં અન્ય સાથે વહેંચી શકાય..એ એકજ ભાવનાથી આ વિભાગ શરૂ કરેલ છે. જાણીતા..માનીતા..પ્રતિષ્ઠિત કવિઓ…લેખકોને તો આપણે બધા જ વાંચતા હોઇએ છીએ…કયારેક આવા ઉત્સાહથી થનગનતા વાચકોને પણ માણીશું ને ? પ્રોત્સાહન આપીશું ને ? બની શકે કાલે એમની પાસેથી કોઇ ઉત્તમ રચના મળી શકે..

આજે આવા જ એક વાચક..ઉત્તમ ભાવક ઉષાબેન પટેલની રચના….આશા છે..આપને ગમશે અને આપનું પ્રોત્સાહન પણ પ્રતિભાવ તરીકે મળશે….આટલી પ્રસ્તાવના અને આભાર સાથે…..
આજે ઉષાબહેનની આ રચના….

ભાવથી ભાવ મળે તો; ઉર્મિનો સાગર લહેરાય;
દિલથી આત્મા મળે તો બુદ્ધિનો સંગમ થાય.

વાત અને સાથ મળે તો લાંબી મંઝિલ પણ કપાય;
જ્ઞાન અને સત્સંગથી આત્મા અને પરમાત્માનું મિલન થાય.

શબ્દથી શબ્દ મળે તો કઈંક ગઝલ બની જાય;
શબ્દથી શબ્દ મળે તો દિલોના સેતુ રચાય.

શબ્દ થી શબ્દ મળે તો સાગર પણ મીઠો બની જાય;
શબ્દનો સાગર અંદર છે અને બીજો બહાર બંને ભળી જાય.

ત્યારે “અર્પિતા” ગગન થી ધરાનું મિલન ક્ષિતિજે થઈ જાય;
શબ્દ અને મૌનનું મહત્વ હરેક ને જો સમજાય તો વ્યર્થ ના લખાય.

છંદસ કે અછંદસ બધુંય મટી જાય જો લેખનીને ભાવ મળી જાય;
એક પતંગિયાને ઉડવાને “નીલું” આકાશ મળી જાય.
ઉષા પટેલ..