ચપટી ઉજાસ…60

લગ્નની ધમાલ

આજે સવારે અમને બધાને મમ્મીએ જલદી જલદી ઉઠાડી દીધા. મને તો હજુ ઉંઘ આવતી હતી.પણ મમ્મીએ સૂવા ન દીધી.

‘ જૂઇ, ચાલ, જલદી તૈયાર કરી દઉં…

અરે, મમ્મી તો અત્યારમાં તૈયાર હતી..વાહ..કેવી સરસ લાગતી હતી મારી મમ્મી. મને એને વહાલ કરવાનું મન થઇ આવ્યું..હું લાડથી તેને ચોંટવા ગઇ..ત્યાં તો મમ્મીએ મને ખેંચી..મારો હાથ પકડી જલદી જલદી બાથરૂમમાં લ ઇ ગઇ. ત્યાં દાદીમા જેવા કોઇ બહેન આવ્યા,

’નિશા, લાવ છોકરીને હું નવડાવી દઉં..એના કપડાં મને આપી દે..હું તૈયાર કરી દઇશ. તું ને નિયતિ આજે સ્વરા પાસે રહો. છોકરાઓ તો ફરતા રહેશે.હમણાં જાન આવી પહોંચશે.

‘ કાકી, એને જરાક દૂધ કે નાસ્તો કંઇક આપી દેજો ને..’ જતા જતા મમ્મી બોલતી ગઇ.

’હા..હા..તું ચિંતા ન કર..છોકરાનું હું સંભાળી લઇશ. એ કાકીએ મને જલદી જલદી ખાલી પાણી રેડીને બે મિનિટમાં નવડાવી દીધી. પછી જેમતેમ લૂછીને કપડાં પહેરાવ્યા. મને જરાયે મજા ન આવી. પણ હું કંઇ બોલી નહીં.

આજે મેં સરસ મજાનું ફ્રોક પહેર્યું હતું. પણ મમ્મી મને મૂકીને ચાલી ગઇ એ મને ન ગમ્યું. ત્યાં નિયતિમાસી આવી પહોંચ્યા. તેની સાથે પલક પણ હતી..કેવી સરસ તૈયાર થઇ હતી પલક. આ કાકીને તો મને તૈયાર કરતા પણ કયાં આવડતું હતું ? પરંતુ નિયતિમાસીએ કાકીને કહું, ’ કાકી, તમે છોકરાઓ માટે દૂધ નાસ્તો કઢાવો ત્યાં હું જૂઇને તૈયાર કરીને આવું છું. હાશ..અને પછી તો માસીએ મને પણ પલકની જેમ સરસ મજાની તૈયાર કરી દીધી. ફરીથી હાથમાં નવી બંગડીઓ અને ગળામાં માળા..આજે માસીએ તો રૂમાલ પણ ભરાવી દીધો.

‘ જૂઇ, તું ને પલક ચાલો, કશુંક ખાઇ લો..આજે કોઇને તમારી સામે જોવાનો સમય નહીં હોય. ત્યાં સાગરભાઇ આવ્યો. ફૈબા, તમને સ્વરાફૂઇ અને નિશા ફૂઇ બોલાવે છે.

‘ સારું..હું જાઉં છું..સાગર, આજે તારે પલક અને જૂઇ સાથે રહેવાનું છે હોં..તેનું ધ્યાન રાખીશ ને ? જાવ, તમે બધા નાસ્તો કરી લેજો.જૂઇ નાની છે એને જરાક જોજે હોં ભાઇ..કાલે તને મોટી કેડબરી આપીશ. ’ ઓકે..ફૂઇ, સાગરભાઇ ખુશ થઇને બોલ્યો.

નિયતિમાસી અમારો હવાલો સાગરને સોંપીને દોડયા.આજે જેને જુઓ તે બધા દોડતા જ હતા. હું પણ સમજયા સિવાય પલક અને સાગરભાઇ સાથે દોડતી રહી..

પલક કહે ચાલ, આપણે સ્વરામાસી પાસે જઇએ .આજે તે બહું સરસ તૈયાર થયા છે..આજે એના લગ્ન છે ને એટલે.

.’ લગન એટલે ? ‘

મેં પલકને પૂછયું. પણ પલકે કોઇ જવાબ દીધા સિવાય મને ખેંચી.

અમે બંને સ્વરામાસી પાસે પહોંચ્યા. અરે વાહ…સ્વરામાસી તો આખા ઝગમગ..ઝગમગ… કેવા સરસ લાગતા હતા માસી! મને જોઇ ધીમેથી કહે,

‘ જૂઇ,આવ મારી પાસે…’ હું તેની પાસે પહોંચું એ પહેલા મમ્મીએ કહ્યું,

‘ સ્વરા, તારું કશું બાકી નથી ને ? જાન આવી ગઇ છે ..હમણાં તારે હાર પહેરાવવા જવાનું છે..’ હા..દીદી..ધીમેથી માસીએ જવાબ આપ્યો. માસીનો અવાજ રોજ કરતા મને સાવ જુદો કેમ લાગ્યો ?

નિયતીમાસી અને મામી હસતા હસતા કહે, ’ બેનબા કયારના ઉતાવળા થઇને જ બેઠા છે. આ એની આંખ જ જુઓને !જીભ ગમે તે બોલી શકે..આંખ બધી ચાડી ફૂંકી દે..એ કયારેય ખોટું ન બોલી શકે. સ્વરાબેન કે’ દાડાના પૈણુ પૈણુ કરતા’તા..છાના ને છપના મોબાઇલ કરતા’તા..

અને ત્યાં રહેલ બધા ખખડાટ હસી પડયા.સમજયા વિના હું ને પલક પણ તેમાં સાથ પૂરાવી ઉઠયા. અચાનક હું મોટેથી બોલી ઉઠી.. મારે યે લગન કરવા છે…

અરે, આ જૂઇને પણ માસીનું જોઇને ઉતાવળ આવી છે. તે દિવસે યે આવું જ કંઇક કહેતી હતી ને ?

‘ અરે, નિશા, આ સ્તુતિનો દીકરો આર્ય ચાર વરસનો છે..ચાલશે જૂઇ માટે ? જો આ સામે ઉભો ઉભો કેવો ટગર ટગર તારી દીકરીને જુએ છે. બોલ,મંજૂર છે ? તો કરીએ કંકુના..’

બોલતા બોલતા નિયતિમાસી હસી પડયા. કોઇએ મને પૂછ્યું,

‘ જૂઇ, તને આર્ય ગમે છે ?

મેં તો ફટ દઇને જવાબ દીધો,

’મને તો સાગરભાઇ ગમે છે..’

લો..આણે તો મામા ફઇવાળી કરી..’ કોઇ બોલ્યું. અને સ્વરામાસી સહિત બધા મોટેથી હસી રહ્યા.બધાને જાણે મજા પડી ગઇ હતી. આ છોકરાઓનું બોલવું કેવું મીઠું લાગે નહીં ? કોઇક બોલ્યું..

આખો ઓરડો ભરાયેલ હતો.હવે તો કોણ બોલતું હતું એની પણ મને ખબર નહોતી પડતી. બધા મારી ઉપર હસતા હતા કે શું ? મને કંઇ ખબર ન પડી.

પણ ત્યાં બહારથી કોઇ બોલાવવા આવ્યું. વરરાજા આવી રહ્યા છે.ચાલો જલદી..સ્વરાને લઇને આવો. સ્વરામાસી હળવે પગલે ચાલ્યા..કયાં ? અને તેની સાથે આખું ટોળું ચાલ્યું. હું પણ પાછળ પાછળ દોડી.

મારા લગન કયારે થશે ? ત્યારે હું પણ સ્વરામાસીની જેમ આખી ઝગમગ..ઝગમગ…

(જનસત્તા..લોકસત્તામાં દર રવિવારે પ્રકાશિત થતી શ્રેણી )

4 thoughts on “ચપટી ઉજાસ…60

  1. જૂઈ ની આંખો ભાવિ અરમાનોના શમણાં જુવે છે. એ સ્વાભાવિક છે. આ છે! ભારતીય અને ખાસ કરીને ગુજરાતની માટી ની ખુશ્બુ. એ વાતનું આબેહૂબ ચિત્રણ સર્જક્ની કાબિલેતારિફ માગી લે છે. “મોરના ઈંડાને ચિતરવાની જરૂર ના પડે.”……………સાચુંને? નિલમ બહેન.

    ઉષા.

    Like

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s