મારો પરિચય.....

હું એટલે નીલમ હરીશ દોશી..મારો ભૌતિક ..સ્થૂળ પરિચય..

જીવનના પાંચ દાયકા વીતવા આવ્યા છે. એક પુત્ર અને એક પુત્રી ..પૂજા અને હાર્દિક બંને અમેરિકામાં… બંને હકીકતે ત્રણે ( વહુ ગતિ પણ ) ડોકટર..જમાઇ જીતેન એંજીનીયર..
બધા વેલસેટલ્ડ અને ખૂબ ખૂબ પ્રેમાળ.. નાની દોહિત્રી જિયા હજુ એક વરસની છે.

હરીશ.મારા જીવનસાથી ખરા અર્થમાં મારા મિત્ર છે. સહજીવન જ નહીં સખ્યજીવન જીવીએ છીએ..હાલમાં અહીં ઓરીસ્સામાં  પારાદીપ ફોસ્ફેટમાં વાઇસ પ્રેસીડેંટ છે. કેમીકલ એંજીનીયર ( બનારસ હિન્દુ યુનીવર્સીટી ) છે. ઇશ્વરે ખોબલે ખોબલે આપ્યું છે. અવારનવાર અમેરિકા જઇએ છીએ.. બાળકો સાથે તેમનો સ્નેહ માણીએ છીએ..દીકરો..દીકરી તો પ્રેમાળ હોય જ પરંતુ જમાઇ અને વહુ બંને ખૂબ ખૂબ પ્રેમાળ છે. એ ઇશ્વરની પરમ કૃપા છે.

સમાજ માટે કશુંક કરી શકાય.. હકારાત્મક અભિગમ ફેલાવી શકાય એ એક લેખક તરીકેની નિષ્ઠા છે. બાળકો અતિશય પ્રિય છે. સમય અને સંજોગો સાથ આપે તો નજીકના ભવિષ્યમાં અનાથ બાળકો માટે કશુંક કરવાની ભાવના..એ એક માત્ર સપનું જીવનનું..

અને હવે મારા લેખન કાર્ય વિશે થોડું..

જીવનની ગમતી ક્ષણો..એટલે મારી શબ્દયાત્રા….અને આ યાત્રામાં મિત્રો સામેલ થાય તો એથી વિશેષ રૂડું બીજું શું હોઇ શકે ? અહીં જે લખાય તેમાંથી આપને ગમે તે આપનું…અને ન ગમે તે મારું તો છે જ..! આ સહિયારી યાત્રામાં ગુલાલના થોડા છાંટણાથી આપની બે ચાર ક્ષણો રંગી શકાય તો પણ એની સાર્થકતા. જીવન પ્રત્યે સતત પોઝીટીવ.. હકારાત્મક અભિગમ એ જીવનલક્ષ્ય….અને એ જ આશા સાથે….અને શબ્દો જીવનમાં પણ મહોરી ઉઠે એ લેખન અને લેખકની કસોટી. એ કસોટીમાં કેટલે અંશે સફળ થઇ શકીશ. તે જાણ નથી. પણ નિષ્ઠાપૂર્વકના પ્રયત્નો ચાલુ રહેશે જ..કોઇ શકા, આશંકા વિના…

” મારું જીવન..એ જ મારો સંદેશ..’ એમ તો ગાંધીજી જેવા મહાન વ્યક્તિ કહી શકે..મારી એ પાત્રતા નથી..એ જાણું છું. પરંતુ કયારેક મારા શબ્દો..મારું લેખન.. એ જ મારું જીવન બની રહે…એવી ભાવના સાથે…

લેખન કાર્ય…: પ્રકાશિત પુસ્તકો…

1…. ” ગમતાનો ગુલાલ ” ( બાળનાટય સંગ્રહ…ગુર્જર પ્રકાશન..અમદાવાદ )

મારા આ પુસ્તકને ગુજરાત સાહિત્ય અકાદમીનો વર્ષ 2006નો શ્રેષ્ઠ પુસ્તક તરીકેનો એવોર્ડ મળી ચૂકેલ છે.

2…બીજું પુસ્તક દીકરી મારી દોસ્ત…..પુસ્તક..ગુર્જર પ્રકાશન અમદાવાદ….દ્વારા પ્રકાશિત થયેલ છે. જેની ત્રણ વરસના ટૂંકા ગાળામાં ચોથી આવૃતિ થઇ ચૂકી છે.અને તેનું અંગ્રેજી ભાષાંતર આવી ચૂકયું છે. “ડોટર માય ફ્રેંડ “
.આ પુસ્તક હિન્દી અને સંસ્કૃત ભાષામાં પણ થઇ રહ્યું છે.

3…ત્રીજું પુસ્તક ” જન્મદિવસની ઉજવણી ” પ્રકાશિત થઇ ચૂકયું છે. જેમાં બાળકો માટે લખાયેલ નાટકોનો સંગ્રહ છે. ( ગુર્જર પ્રકાશન ..અમદાવાદ )આ પુસ્તકને પણ સાહિત્ય અકાદમીનો શ્રેષ્ઠ પુસ્તક વરસ 2009 નો એવોર્ડ મળેલ છે.

4.”પાનેતર ” 99 લઘુકથાઓનો સંગ્રહ ડિવાઇન પ્રકાશન..અમદાવાદ

5 ” અંતિમ પ્રકરણ ” નવલિકા સંગ્રહ ( ગુર્જર પ્રકાશન..અમદાવાદ )જેને તાજેતરમાં ડીસેમ્બર 2012માં સુરતમાં યોજાયેલા જ્ઞાનસત્રમાં ગુજરાત સાહિત્ય પરિષદ તરફથી ભગિની નિવેદીતાનો બેસ્ટ બુક ઓફ ધ યરનો એવોર્ડ મળેલ છે.

6 ” સાસુ વહુ.કોમ ” .
.( સાસુ અને વહુના એકમેકને સંબોધીને લખાયેલ આ પત્રો સાસુ અને વહુ બંનેને સમજવાની..ઘડવાની દિશા દર્શાવનાર બની રહેશે. એક જ વાતને સાસુ અને વહુ બંને પોતાની રીતે કેવી રીતે મૂલવે છે..એ જાણવાની ..સમજવાની મથામણ આ ભાવવાહી પત્રોમાં વ્યક્ત થયેલી છે. જીવનને વધુ સુંદર બનાવવાની આ એક સમજણભરી શરૂઆત છે.

આગામી પ્રકાશનો..

6..નવલથા..” દોસ્ત, મને માફ કરીશ ને ? ” ( ડિવાઇન પ્રકાશન અમદાવાદ..)

7..સંબંધસેતુ ” ( સ્ત્રી સાપ્તાહિકમાં હપ્તાવાર પ્રગટ થયેલ લેખોનો સંગ્રહ..જેમાં સાંપ્રત પરિસ્થિતિમાં કોઇ પણ બે સંબંધ વચ્ચે દીવાલ ને બદલે સેતુ કેમ રચી શકાય તે અંગેના સાચા ઉદાહરણોનો સંચય..જે દરેક વ્યક્તિ માટે દીવાદાંડી સમાન બની શકે )

8 ” દીકરો હેત નો સમંદર ..” દીકરી માટે આજકાલ ઘણું લખાઇ રહ્યું છે..ઘણું લખાઇ ચૂકયું છે. એક માના તેના પુત્રને ઉદ્દેશીને લખાયેલ ડાયરી સ્વરૂપના આ પત્રો માતા, પિતા અને પુત્રને જોડતી કડીરૂપ સાબિત થશે એવી આશા અસ્થાને નહીં લેખાય. એક પુત્ર જયારે માતા, પિતાની ભાવના સમજી શકે..સ્વીકારી શકે ત્યારે સ્વર્ગ ઘરમાં જ રચાઇ જાય.

9 એક તદ્દન નોખી જ ભાત પાડતી નવલકથા ” ઝિલમિલ “..અલગ કોમમાં પરણેલ છોકરો કે છોકરી જયારે પોતપોતાના ધર્મને છોડી ન શકે..અન્યના ધર્મને અપનાવી ન શકે ત્યારે એમના સંતાનોને કેવી માનસિક વ્યથામાંથી પસાર થવાનું આવે છે..એક સંવેદનશીલ સંતાનના મનમાં કેવા વમળો સર્જાય છે..અને તેનું કેવું પરિણામ આવે છે તે દર્શાવતી એક અલગ જ પ્રકારની નવલકથા… વાચકોની આંખ અને અંતર અચૂક ભીના કરી રહેશે..

બાકી. લેખન યાત્રા અવિરત ચાલુ છે અને રહેશે.મળતા રહીશું શબ્દોને સથવારે..નેટવિશ્વ કે પ્રીંટ વિશ્વ બંને જગ્યાએ…

નિયમિત કોલમ : સન્દેશ માં ” એક નાનકડી વાત ” અને સ્ત્રીમાં ” સંબંધ સેતુ. ” અને ” જીવનની ખાટી મીઠી…” દર અઠવાડિયે..છેલ્લા છ  વરસથી સતત ચાલુ છે.

” ગુજરાત ગાર્ડીયન ”   સુરતથી પ્રકાશિત થતા દૈનિકમાં દર રવિવારે કોલમ ”  અત્તરકયારી” અને દર મંગળવારે કોલમ ” પત્રસેતુ ” ચાલુ છે.

ગુજરાત ગ્લોબલ ન્યુઝ. ( જી.જી.એન. ) વેબ પોર્ટલમાં દર રવિવારે કોલમ ” અત્તરગલી ” નિયમિત પ્રકાશિત થતી શ્રેણી છે.

હાલમાં દિવ્ય ભાસ્કર દૈનિકમાં હપ્તાવાર પ્રગટ થતી નવલકથા ” દોસ્ત, મને માફ કરીશ ને ? ” હવે પુસ્તક આકારે પ્રકાશિત થઇ રહી છે.

” ચપટી ઉજાસ ” ..જનસત્તા..લોકસત્તામાં નિયમિત પ્રગટ થતી કોલમ ખાસ્સી લોકપ્રિય સાબિત થઇ રહી છે.

વાર્તાઓ, લેખો, કાવ્યો, લલિત નિબંધો વિગેરે રચનાઓ અવારનવાર અખંડ આનંદ, નવનીત સમર્પણ, શબ્દ્સૃષ્ટિ, પરબ, દિવ્યભાસ્કર, સંદેશ, ગુજરાત,જન્મભૂમિ પ્રવાસી, અભિયાન, મુંબઇ સમાચાર, અહા ઝિન્દગી, ઉદ્દેશ, કાવ્યસૃષ્ટિ, શબ્દસર, વિચારવલોણુ, જનકલ્યાણ, સ્ત્રી,જલારામ દીપ, છાલક  વગરેમાં પ્રકાશિત થતી રહે છે. અને ભાવકોના સ્નેહભર્યા પ્રતિભાવોથી છલકી રહું છું.

વાર્તા, નાટક અને લલિત નિબંધો જુદી જુદી હરિફાઇમાં પ્રથમ નંબર પ્રાપ્ત કરી ચૂકયા છે.

” ઝાલરટાણુ ” રેડિયો પર પ્રકાશિત નાટય રચના…

અનેક શૈક્ષણિક કાર્યક્રમો અને કાવ્યના રસાસ્વાદ આકાશવાણી રાજકોટ પરથી પ્રસારિત..

અરૂપ શું બોલે ? અને ખંડિત મૂર્તિ..( દિવ્ય ભાસ્કર ગોલ્ડમાં પ્રકાશિત થયેલ લઘુ નવલ )
મારા દરેક પુસ્તકો ઓનલાઇન ઇ બુક તરીકે પણ ઉપલબ્ધ છે જ.
link is..
http://www.bookganga.com
http://www.my vishva.com

આ શબ્દયાત્રા સ્નેહયાત્રા બની રહે..અને અવિરત ચાલુ રહેશે એ શ્રધ્ધા વધુ પડતી તો નથી ને ?
નીલમ દોશી

સ્વાગત

સુખ,દુ:ખ ,આશા,નિરાશા…આંસુ-સ્મિત રમૂજ કે ચિંતા…વ્યથા કે વલોપાત,આનંદ નો અવસર હોય કે શોક નો પ્રસંગ….માણસને …પોતાની પાસે જે કંઇક પણ છે …કે જે પોતાને ગમે છે ….તે બીજા ને કહેવાની …વહેંચવાની માનવસહજ વ્રુત્તિ દરેક મનુષ્ય માં ઓછે વત્તે અંશે હોય જ છ ફાધર વાલેસે આ માટે તેના એક પુસ્તક માં સરસ ઉદાહરણ આપ્યું છે.તે અહીં ટાંકવાનો લોભ જાગે છે.
“એક વૈજ્ઞાનિક નવલકથાનો નાયક માનવજાતથી રીસાઇને પ્રુથ્વી પર કદી પાછા ન આવવાની પ્રતિજ્ઞા લઇ પોતાના અવકાશ યાન માં એકલો એકલો બ્રહ્માંડ ની અનંત યાત્રાએ ઉપડે છે.ત્યારે આકાશ ની અદભૂત શોભા નું દર્શન થતા એ બબડે છે:’આ સૌન્દર્ય ની વાત હવે હું કોને કરું?’ ..અને ધીરેથી અવકાશયાન ફેરવીને માનવજાત ની ગોદ માં પાછો આવી જાય છે.” આમ ગમે તેટલો અંતર્મુખી (introvert) માણસ પણ કયાંક તો પોતાનું હ્ર્દય ઠાલવે જ છે.માણસ ને માણસ વિના ચાલતું નથી..ને ચાલવું પણ ન જોઇએ.
અહીં મારો હેતુ પણ ફકત એટલો જ છે…જે મને ગમ્યુ છે…તે બીજા લોકો સાથે share કરું.મને જે ગમ્યું છે તે બધા ને ગમે જ તે જરૂરી નથી..પણ જેને પણ ગમે તે માણી શકે …અને આદાન –પ્રદાન ની પ્રક્રિયા આગળ વધી શકે.અને દરેક માણસ ને એક અપેક્ષા હોય જ છે “કોઇ મને ચાહે અને સમજે”આ માનવસહજ સ્વભાવ છે પ્રેમ આપવાની ને પ્રેમ મેળવવાની અનંત ઝંખના દરેકમાનવ ની અંદર એક યા બીજી રીતે હોય જ છે.કોઇ પોતાની લાગણી શબ્દો માં વ્યકતકરી શકે છે ,તો કોઇ નથી કરી શકતા..એ અલગ વાત છે.બાકી સાચી લાગણી જેને મળી છે ,એ નશીબદાર છે જ.એવા નશીબદાર બનવાની ઇચ્છા કોને ન હોય?
આ બ્લોગ ખાસ કરી ને સમસ્ત વિશ્વ ની દીકરીઓ ને સમર્પિત કરતા મને આનંદ થાય છે.કદાચ દીકરી માટે હું પહેલેથી જ થોડી પક્ષપાતી રહી છું.( અને માત્ર હું શા માટે? દરેક દીકરી ની મા માટે આ સાચું નથી?)
અને દરેક સ્ત્રી…કોઇ ની ને કોઇ ની દીકરી તો હોય જ છે ને?”મા” બની ને એ દીકરી મટી નથી જતી.અને સ્ત્રી….સંસ્ક્રુત શબ્દ સ્ત્રુ માંથી આવ્યો છે.સ્ત્રુ એટલે વિસ્તરવું…..જે વિસ્તરે છે તે સ્ત્રી…છોકરી કે છોકરો બંને ની જન્મદાતા સ્ત્રી જ છે.એટલે કોઇ પણ છોકરા…પુરૂષ નો પહેલો સંબંધ …પહેલો પરિચય તો સ્ત્રી સાથે જ ને?આંખ પણ ઉઘાડયા પહેલાનો પરિચય…સ્ત્રી.
એટલે દીકરીને સમર્પિત કરતા, એમાં બીજી રીતે જોઇએ તો સમસ્ત વિશ્વ આવી ગયું ને?
બસ…આટલું જ……આશા છે આપ સૌનો સહકાર,પ્રેમ મળશે
અસ્તુ
આભાર સાથે 

નીલમ દોશી